ഐഎസ്എല്ലിൽ കേരള ബ്ലാസ്റ്റേഴ്സിൻെറ പുതിയ പരിശീലകനായി സെർബിയക്കാരൻ ഇവാൻ വുക്കോമാനോവിച്ച് എത്തിയേക്കുമെന്ന് റിപ്പോർട്ടുകൾ. കഴിഞ്ഞ സീസണിലെ ദയനീയ പ്രകടനത്തിന് ശേഷം പരിശീലകൻ കിബു വികുനയ്ക്ക് പകരക്കാരനായാണ് വുക്കോമാനോവിച്ച് എത്തുന്നത്. വൈകാതെ സെർബിയൻ പരിശീലകൻ ക്ലബ്ബുമായി കരാറൊപ്പിടുമെന്നാണ് റിപ്പോർട്ടുകൾ.
2014 മുതൽ കേരള ബ്ലാസ്റ്റേഴ്സിനെ പരിശീലിപ്പിക്കുന്നവരിൽ പത്താമനാണ് വുക്കോമാനോവിച്ച്. 43കാരനായ വുക്കോമാനോവിച്ച് ബെൽജിയൻ ക്ലബ്ബിൻെറ സഹപരിശീലകനായാണ് കോച്ചിങ് കരിയർ ആരംഭിക്കുന്നത്. സ്ലൊവാക് സൂപ്പർ ലീഗിലാണ് ആദ്യമായി ക്ലബ്ബിനെ പരിശീലിപ്പിച്ച് തുടങ്ങിയത്. കേരള ബ്ലാസ്റ്റേഴ്സിന് വേണ്ടി കഴിഞ്ഞ സീസണിൽ ഇറങ്ങിയ ഫക്കുണ്ടോ പെരെയ‍്‍ര വുക്കോമാനോവിച്ചിൻെറ പരിശീലത്തിൽ കളിച്ചിട്ടുള്ളയാളാണ്. പുതിയ പരിശീലകനെ നിയമിക്കുന്നതുമായി ബന്ധപ്പെട്ട് കേരള ബ്ലാസ്റ്റേഴ്സ് ഇത് വരെ ഔദ്യോഗിക പ്രഖ്യാപനമൊന്നും നടത്തിയിട്ടില്ല.