റിയാദ്: കോവിഡ് വ്യാപനം കൂടിയതോടെ നിർത്തി വാഹച്ചിരുന്ന വിനോദ പരിപാടികൾ രാജ്യത്ത് നിയന്ത്രണങ്ങളോടെ പുനരാരംഭിക്കാൻ അനുവദിച്ചതായി ജനറൽ എന്റർടൈൻമെന്റ് അതോറിറ്റി അറിയിച്ചു. ജി.ഇ.എ ചെയർമാൻ തുർക്കി അൽ ഷെയ്ഖ് ട്വിറ്ററിലൂടെയാണ് ഇക്കാര്യം അറിയിച്ചത്.

 'എല്ലാവരുടെയും സുരക്ഷാ ഉറപ്പു വരുത്തുന്നതിനായി ചില നിയന്ത്രണങ്ങൾക്കനുസൃതമായി വിനോദ പ്രവർത്തനങ്ങൾ പുനരാരംഭിക്കും. വിനോദ പരിപാടികൾ നടക്കുന്ന സ്ഥലങ്ങളിൽ മൊത്തം കപ്പാസിറ്റിയുടെ 40 ശതമാനം ആളുകളെ മാത്രമേ പ്രവേശിപ്പിക്കാവൂ. പങ്കെടുക്കുന്നവർ രാജ്യത്ത് അംഗീകരിച്ച കോവിഡ് വാക്സിനേഷൻ പൂർത്തിയാക്കിയവരും തവക്കൽന മൊബൈൽ ആപ്ലിക്കേഷൻ വഴി ഇതിന്റെ തെളിവ് ഹാജരാക്കുകയും വേണം. കൂടാതെ സാമൂഹ്യ അകലം പാലിക്കുകയും മാസ്ക് ധരിക്കുകയും വേണം. സാമൂഹ്യ അകലം പാലിക്കാത്തവരെ അകത്തേക്ക് പ്രവേശിപ്പിക്കാൻ പാടില്ല. പരിപാടി നടത്താനൊരുങ്ങുന്ന ഇവന്റ് ഓർഗനൈസർമാർ ജനറൽ എന്റർടൈൻമെന്റ് അതോറിറ്റി വഴി പെർമിറ്റിനായി അപേക്ഷിക്കണം. കൂടാതെ ടിക്കറ്റ് വിൽപ്പന ഓൺലൈൻ ആക്കുകയും വേണം.' നിർദ്ദേശത്തിൽ പറയുന്നു.