മനാമ: ബഹ്‌റൈനിൽ കോവിഡ് കേസുകൾ വർധിക്കുന്ന സാഹചര്യത്തിൽ നിയന്ത്രണങ്ങള്‍ കടുപ്പിക്കാന്‍ തീരുമാനം. ഇതിന്റെ ഭാഗമായി മെയ് 27ന് അര്‍ധ രാത്രി 12 മണി മുതല്‍ ജൂണ്‍ 10 രാത്രി 12 മണി വരെ അടിയന്തര സേവനങ്ങള്‍ നല്‍കുന്ന സ്ഥാപനങ്ങളൊഴികെ മറ്റെല്ലാ സ്ഥാപനങ്ങളും വാണിജ്യകേന്ദ്രങ്ങളും അടച്ചിടാന്‍ നാഷണല്‍ മെഡിക്കല്‍ ടാസ്‌ക് ഫോഴ്സ് തീരുമാനിച്ചു.


 കഴിഞ്ഞ ഒരാഴ്ചയ്ക്കിടെ രാജ്യത്ത് ഇതുവരെ റിപ്പോര്‍ട്ട് ചെയ്യപ്പെട്ടതില്‍ വച്ച് ഏറ്റവും ഉയര്‍ന്ന തോതിലുള്ള പ്രതിദിന കൊവിഡ് കേസുകളും കൊവിഡ് മരണങ്ങളും റിപ്പോര്‍ട്ട് ചെയ്യപ്പെട്ട സാഹചര്യത്തിലാണ് പ്രതിരോധ നടപടികള്‍ ശക്തമാക്കുന്നതെന്ന് അധികൃതര്‍ വാര്‍ത്താസമ്മേളനത്തില്‍ വ്യക്തമാക്കി. കഴിഞ്ഞ തിങ്കളാഴ്ച 2800 പ്രതിദിന കൊവിഡ് കേസുകളായിരുന്നു ബഹ്‌റൈനില്‍ റിപ്പോര്‍ട്ട് ചെയ്തത്. ഇതുവരെയുള്ളതില്‍ വച്ച് ഏറ്റവും ഉയര്‍ന്ന നിരക്കാണിത്. അന്നു തന്നെ 28 മരണങ്ങളും രാജ്യത്ത് റിപ്പോര്‍ട്ട് ചെയ്‌പ്പെടുകയുണ്ടായി. ഇതിനകം 852 പേരാണ് കൊവിഡ് ബാധിച്ച് രാജ്യത്ത് മരണപ്പെട്ടത്.


ഇതുപ്രകാരം ഷോപ്പിംഗ് മാളുകള്‍, സിനിമാശാലകള്‍, റസ്റ്റോറന്റുകള്‍, കോഫി ഷോപ്പുകള്‍, സ്വകാര്യ ജിമ്മുകള്‍, വിനോദ ഹാളുകള്‍, നീന്തല്‍ക്കുളങ്ങള്‍, ബാര്‍ബര്‍ ഷോപ്പുകള്‍, സലൂണുകള്‍ ഉള്‍പ്പെടെയുള്ള സ്ഥാപനങ്ങള്‍ അടച്ചിടും. റസ്റ്റോറന്റുകളില്‍ ഡെലിവറി സേവനം മാത്രം അനുവദിക്കും. അതേസമയം, അടിയന്തര സര്‍വീസുകളായ ഹൈപ്പര്‍മാര്‍ക്കറ്റുകള്‍, സൂപ്പര്‍മാര്‍ക്കറ്റുകള്‍, കോള്‍ഡ് സ്റ്റോറുകള്‍, പലചരക്കു കടകള്‍, മല്‍സ്യ ഷോപ്പുകള്‍, ബേക്കറികള്‍, ഗ്യാസ് സ്റ്റേഷനുകള്‍, ആശുപത്രികള്‍, എടിഎമ്മുകള്‍, ഫാര്‍മസികള്‍ തുടങ്ങിയവ തുറന്നിരിക്കും. സര്‍ക്കാര്‍- പൊതു മേഖലാ ഓഫീസുകളിലെ ഹാജര്‍നില 30 ശതമാനമായി കുറയ്ക്കണം. ബാക്കിയുള്ളവര്‍ വര്‍ക്ക് ഫ്രം ഹോം രീതിയില്‍ പ്രവര്‍ത്തിക്കണം. 


സര്‍ക്കാര്‍, സ്വകാര്യ വിദ്യാഭ്യാസ സ്ഥാപനങ്ങള്‍, പരിശീലന കേന്ദ്രങ്ങള്‍ എന്നിവിടങ്ങളില്‍ നേരിട്ടുള്ള ക്ലാസ്സുകള്‍ പാടില്ല. ഇവിടങ്ങളില്‍ വിദൂര പഠനം തുടരും. സ്വകാര്യ ചടങ്ങുകള്‍, ഒത്തു ചേരലുകള്‍, കായിക പരിപാടികള്‍ എന്നിവയ്ക്കും വിലക്കുണ്ട്. സമ്മേളനങ്ങളോ യോഗങ്ങളോ ചേരുന്നതിനും രണ്ടാഴ്ചത്തേക്ക് വിലക്കേര്‍പ്പെടുത്തി.