കുവൈറ്റ് സിറ്റി : കുവൈറ്റിൽ ഡ്രൈവിങ് ലൈസൻസിന്റെ മുഖം മാറുന്നു. ഇനിമുതല്‍ സ്മാര്‍ട്ട് ചിപ്പ് ഘടിപ്പിച്ച ഹൈടെക് ഡ്രൈവിംഗ് ലൈസന്‍സുകള്‍ ആണ് വിതരണം ചെയ്യുക. ആദ്യഘട്ടത്തില്‍ ഇലക്ട്രോണിക് കിയോസ്‌ക്കുകള്‍ വഴി സ്വദേശികള്‍ക്കു മാത്രമാകും ലൈസന്‍സ് ലഭ്യമാക്കുക. ഐ.എസ്.ഒ മാനദണ്ഡപ്രകാരമുള്ള സുരക്ഷാ ഫീച്ചറുകള്‍ ഉള്‍ക്കൊള്ളിച്ചാണ് ഡ്രൈവിംഗ് ലൈസന്‍സ് പരിഷകരിക്കുന്നത്. അതുകൊണ്ടു തന്നെ കുറുക്കു വഴികളിലൂടെ ലൈസന്‍സ് നേടാനോ വ്യാജമായി ഉണ്ടാക്കാനോ സാധിക്കില്ല. അടുത്തവര്‍ഷം തുടക്കം മുതല്‍ ലൈസന്‍സ് പരിഷ്‌കരണം ആരംഭിക്കുമെന്നാണ് റിപ്പോര്‍ട്ടുകള്‍. രാജ്യത്തിന്റെ വിവിധ ഭാഗങ്ങളില്‍ സ്ഥാപിച്ചിട്ടുള്ള ഇലക്ട്രോണിക് കിയോസ്‌കുകള്‍ വഴി നിലവിലെ രീതിയില്‍ തന്നെയാകും പുതിയ ഹൈടെക്ക് ലൈസന്‍സുകളും വിതരണം ചെയ്യുക.