മുംബൈ: ഭോജ്പുരി സിനിമാ താരം അനുപമ പഥക് (40) തൂങ്ങി മരിച്ച നിലയില്‍. മുംബൈയിലെ വസതിയിലാണ് മൃതദേഹം കണ്ടെത്തിയത്. ആത്മഹത്യയാണെന്നാണ് പൊലീസ് നിഗമനം. അനുപമയുടെ വീട്ടില്‍ നിന്ന് പൊലീസ് ആത്മഹത്യാക്കുറിപ്പ് കണ്ടെടുത്തു. മുംബൈയിലെ ഒരു പ്രൊഡക്ഷന്‍ കമ്പനിയില്‍ പണം നിക്ഷേപിച്ചിരുന്നുവെന്നും എന്നാല്‍ പറഞ്ഞ സമയത്ത് അവരത് തിരിച്ചു നല്‍കിയില്ലെന്നുമാണ് കുറിപ്പിലുള്ളത്. മരിക്കുന്നതിന്റെ തലേ ദിവസം ഇവര്‍ ഫേസ്ബുക്കില്‍ ലൈവില്‍ വന്നിരുന്നു. ഇത് സാമൂഹിക മാധ്യമങ്ങളില്‍ പ്രചരിക്കുകയും വലിയ ചര്‍ച്ചയാവുകയും ചെയ്തിരുന്നു.ബീഹാറിൽ നിന്നും മുംബൈയിലേക്ക് താമസം മാറിയ നടി നിരവധി ഭോജ്പുരി സിനിമകളിലും ടെലിവിഷൻ പരിപാടികളിലും വേഷമിട്ടിട്ടുണ്ട്.