ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ രണ്ടാം സ്ഥാനക്കാരായ മാഞ്ചസ്റ്റര്‍ സിറ്റിയെ അട്ടിമറിച്ച് സതാംപ്റ്റണ്‍. 1-0ത്തിനാണ് കഴിഞ്ഞ സീസണിലെ ജേതാക്കളെ സതാംപ്റ്റണ്‍ അട്ടിമറിച്ചത്. കിരീടമുറപ്പിച്ച ശേഷം പ്രീമിയര്‍ലീഗില്‍ പോയന്റ് റെക്കോഡ് ലക്ഷ്യമിട്ട് കുതിക്കുന്ന ലിവര്‍പൂള്‍ ആസ്റ്റണ്‍ വില്ലയെ 2-0ത്തിനാണ് തോല്‍പ്പിച്ചത്. ലോങ് റേഞ്ച് ഷോട്ടിലൂടെ കന്നി പ്രീമിയര്‍ ലീഗ് ഗോളിനുള്ള കാത്തിരിപ്പ് അവസാനിപ്പിച്ച ചെ ആഡംസാണ് സതാംപ്റ്റണ്‍ വിജയം സമ്മാനിച്ചത്. മിന്നും ഫോമിലായിരുന്ന സതാംപ്റ്റണ്‍ ഗോള്‍കീപ്പര്‍ അലക്‌സ് മക്കാര്‍ത്തിയുടെ പ്രകടനവും സിറ്റിയുടെ സാധ്യതകള്‍ ഇല്ലാതാക്കി. സീസണില്‍ സിറ്റിയുടെ ഒമ്പതാം തോല്‍വിയാണിത്. തുടര്‍ച്ചയായ മൂന്നാം എവേ മത്സരത്തിലാണ് ടീം തോറ്റിരിക്കുന്നത്. കെവിന്‍ ഡിബ്രൂയിനും ഫില്‍ ഫോഡനും വിശ്രമമനുവദിച്ചാണ് സിറ്റി കളത്തിലിറങ്ങിയത്. കോവിഡ് സുരക്ഷ മുന്‍കരുതലുകളുടെ ഭാഗമായി താരങ്ങള്‍ക്ക് വിശ്രമം അനുവദിക്കണമെന്ന ചട്ടങ്ങളുടെ അടിസ്ഥാനത്തിലാണ് ഇരുവരെയും പുറത്തിരുത്തിയത്.