കോഴിക്കോട്: കോഴിക്കോട് കോർപ്പറേഷൻ മുൻ മേയർ യു.ടി. രാജൻ (70) അന്തരിച്ചു. ചൊവ്വാഴ്ച്ച പുലർച്ചെയായിരുന്നു അന്ത്യം. ഹൃദ്രോഗ ബാധയെ തുടർന്ന് ചികിത്സയിലായിരുന്നു. അഭിഭാഷകൻ, രാഷ്ട്രീയ നേതാവ് , സാംസ്‌കാരിക പ്രവർത്തകൻ എന്നീ നിലകളിൽ ശ്രദ്ധേയനായിരുന്നു. സ്വാതന്ത്ര്യ സമര സേനാനിയായ യു.ടി അപ്പുവൈദ്യരുടെയും ചിരുതക്കുട്ടിയുടെയും മകനാണ് യു.ടി.രാജൻ. 1990 ഫെബ്രുവരി അഞ്ചിന് അദ്ദേഹം കോഴിക്കോട് മേയറായി.കോർപ്പറേഷൻ കൗൺസിലിൽ ഇടതുമുന്നണി അധികാരം നേടിയപ്പോൾ ധാരണയനുസരിച്ച് കോൺഗ്രസ്സ് എസ്സിന് മേയർ പദവി ലഭിച്ചപ്പോഴാണ് രാജൻ കോർപറേഷൻ മേയറായത്.