ആലപ്പുഴ: ആലപ്പുഴ കാർത്തികപ്പള്ളി വലിയകൗളങ്ങരയിൽ പന്ത്രണ്ടുകാരി ആത്മഹത്യ ചെയ്ത സംഭവത്തിൽ കുട്ടിയുടെ അമ്മ അശ്വതിയെ (33) പോലീസ് അറസ്റ്റ് ചെയ്തു. അമ്മയുടെ മാനസികവും ശാരീരികവുമായ പീഡനമാണ് കുട്ടി ആത്മഹത്യ ചെയ്യാൻ കാരണമായതെന്ന് പോലീസ് പറഞ്ഞു. ഈ മാസം പതിനാലിനാണ് അശ്വതിയുടെ മകളായ ഹർഷയെ വീട്ടിൽ മരിച്ച നിലയിൽ കണ്ടെത്തിയത്. അശ്വതിയുടെ ആദ്യ വിവാഹത്തിലെ കുട്ടിയാണ് ഹർഷ. കുട്ടിയെ അശ്വതി നിരന്തരം പീഡിപ്പിക്കാറുണ്ടായിരുന്നു എന്ന് നാട്ടുകാർ നേരത്തെ പോലീസിൽ പരാതി നൽകിയിരുന്നു. പലതവണ കുട്ടിയെ ഉപദ്രവിക്കുന്ന ശബ്ദം നാട്ടുകാർ കേട്ടിരുന്നു. കുട്ടി മരിക്കുന്നതിന് തലേ ദിവസവും ശബ്ദം കേട്ടു. രാവിലെ തൂങ്ങി മരിച്ച നിലയിൽ കണ്ടെത്തിയ കുട്ടിയെ ആശുപത്രിയിൽ കൊണ്ടുപോകും മുൻപും അമ്മയുടെ സ്വഭാവത്തിൽ അസ്വാഭാവികത ഉണ്ടായിരുന്നു എന്നും നാട്ടുകാർ ആരോപിക്കുന്നു. ഇതിന്റെ അടിസ്ഥാനത്തിലാണ് പോലീസ് കേസ്സെടുത്ത് അമ്മയെ അറസ്റ്റ് ചെയ്തത്. പോസ്റ്റുമാർട്ടം റിപ്പോർട്ടിൽ കുട്ടിക്ക് മർദ്ദനമേറ്റതിന്റെ തെളിവുണ്ടെന്നും പോലീസ് പറഞ്ഞു.