കൊല്ലം: കൊല്ലം കടക്കലിൽ പോലീസ് ഉദ്യോഗസ്ഥൻ മരിച്ച സംഭവത്തിൽ സുഹൃത്ത് അറസ്റ്റിൽ. ഇവർക്ക് മദ്യം വാങ്ങി നൽകുകയും ഒപ്പം മദ്യപിക്കുകയും ചെയ്ത വിഷ്ണുവിനെയാണ് പോലീസ് അറസ്റ്റ് ചെയ്തത്. മലപ്പുറം പോലീസ് ക്യാംപിലെ കമാൻഡോ അഖിലാണ് മരിച്ചത്. സുഹൃത്തുക്കളുമായി മദ്യപിച്ചതിനു പിന്നാലെ ദേഹാസ്വാസ്ഥ്യം അനുഭവപ്പെട്ട അഖിലിനെ ആശുപത്രിയിൽ എത്തിച്ചെങ്കിലും മരിച്ചു. ഞായറാഴ്ച്ച വെളുപ്പിനായിരുന്നു സംഭവം. അഖിലിനൊപ്പം മദ്യപിച്ച സുഹൃത്ത് ഗിരീഷിനെയും (28) ഛർദ്ദി അനുഭവപ്പെട്ടതിനെ തുടർന്ന് ആശുപത്രിയിൽ പ്രവേശിപ്പിച്ചു. ഇരുവരും അമിതമായി മദ്യപിച്ചിരുന്നു. സ്പിരിറ്റ് കലർന്ന മദ്യമാണ് ഇവർ കഴിച്ചിരുന്നത്. ആശുപത്രി ആവശ്യങ്ങൾക്ക് ഉപയോഗിക്കുന്ന സ്പിരിറ്റാണ് ഇവർ കഴിച്ചതെന്ന് സംശയം ഉണ്ട്. സ്പിരിറ്റ് കിട്ടിയ സ്ഥലത്തെ കുറിച്ച് അന്വേഷണം തുടങ്ങി. അന്വേഷണത്തിനായി പ്രത്യേക സംഘത്തെ നിയോഗിച്ചുവെന്ന് കൊല്ലം റൂറൽ എസ്.പി പറഞ്ഞു.