തിരുവനന്തപുരം: സംസ്ഥാനത്തെ സ്‌കൂൾ കുട്ടികൾക്കായി വിക്ടേഴ്‌സ് ചാനൽ വഴി നടത്തുന്ന ഓൺലൈൻ ക്ലാസ്സിന്റെ രണ്ടാം ഘട്ടം തിങ്കളാഴ്ച്ച മുതൽ തുടങ്ങും. ക്ലാസുകൾ മുൻ നിശ്ചയിച്ച ക്രമത്തിൽ തന്നെയാണ് നടക്കുകയെന്ന് വിദ്യാഭ്യാസ വകുപ്പ് അറിയിച്ചു. ഓൺലൈൻ ക്ലാസുകൾ ആരംഭിച്ച് ആദ്യ ഒരാഴ്ച്ച ഒരേ പാഠഭാഗങ്ങൾ തന്നെയാണ് വിക്ടേഴ്‌സ് ചാനൽ വഴി കാണിച്ചിരുന്നത്. ഇതിനു മികച്ച പിന്തുണയാണ് കിട്ടിയതെന്നും ഓൺലൈൻ പ്ലാറ്റ്‌ഫോമുകളിലും മികച്ച സ്വീകാര്യത കിട്ടിയെന്നുമാണ് വിലയിരുത്തൽ. തുടർന്ന് സംപ്രേക്ഷണം ചെയ്യുന്ന ക്‌ളാസ്സുകളിൽ ഇതര ഭാഷാ വിഷയങ്ങൾക്ക് മലയാളം വിശദീകരണം അനുവദിക്കും. അറബി, ഉറുദു, സംസ്‌കൃതം ക്ലാസ്സുകളും തിങ്കളാഴ്ച്ച തുടങ്ങും. സംസ്ഥാനത്ത് ടി.വി ഇല്ലാത്ത 4000 വീടുകൾ ഉണ്ടെന്നും ഇവർക്ക് രണ്ടു ദിവസത്തിനകം ടി.വി എത്തിക്കുമെന്നും വിദ്യാഭ്യാസ വകുപ്പ് അറിയിച്ചു.