വിതുര : വിക്ടേഴ്‌സ് ചാനലിൽ ഓൺലൈൻ ക്ലാസ് എടുത്തിരുന്ന സർക്കാർ സ്‌കൂൾ അധ്യാപകനെ തോട്ടിൽ മരിച്ച നിലയിൽ കണ്ടെത്തി. വിതുര ഗവ: യു.പി സ്‌കൂളിലെ അധ്യാപകനും നന്ദിയോട് പച്ച സ്വദേശിയുമായ ബിനുകുമാറിനെയാണ് മരിച്ച നിലയിൽ കണ്ടെത്തിയത്. നന്ദിയോട് ശാസ്താ ക്ഷേത്രത്തിനടുത്ത് ഓട്ടുപാലം കടവിൽ നിന്ന് വീട്ടിലേക്ക് നടന്നു പോകുമ്പോൾ കാൽ വഴുതി തോട്ടിൽ വീണതാണെന്നാണ് സൂചന. രണ്ടു കിലോ മീറ്റർ അകലെയുള്ള പാലോട് ആശുപത്രി ജംക്ഷന് സമീപമുള്ള കടവിൽ നിന്നാണ് മൃതദേഹം കണ്ടെത്തിയത്. വിക്ടേഴ്‌സ് ചാനലിൽ ഗണിതം ക്‌ളാസ് എടുക്കുന്ന അധ്യാപകനായിരുന്നു. അടുത്ത ദിവസം ചാനലിൽ ക്ലാസ് സംപ്രേക്ഷണം ചെയ്യാനിരിക്കെയാണ് മരണം. മരണത്തിൽ ദുരൂഹതയില്ലെന്നാണ് പോലീസ് നിഗമനം. മൃതദേഹം ആശുപത്രിയിലേക്ക് മാറ്റി.