പരിയാരം: ചക്ക തലയിൽ വീണു ഗുരുതരാവസ്ഥയിലായ യുവാവിന് പരിശോധനയും കോവിഡ് സ്ഥിരീകരിച്ചു. വ്യാഴാഴ്ച്ച രാത്രിയാണ് ചക്ക തലയിൽ വീണു ഗുരുതരാവസ്ഥയിലായ യുവാവിനെ കാസർകോട്ട് നിന്നും പരിയാരം മെഡിക്കൽ കോളേജിൽ എത്തിച്ചത്. മുന്നേ രണ്ട് ആശുപത്രികളിൽ എത്തിച്ചെങ്കിലും ഗുരുതരാവസ്ഥയിലായതിനാൽ പരിയാരത്ത് കൊണ്ട് വരികയായിരുന്നു. കയ്യും കാലും തളർന്ന നിലയിലായ ഇയാൾക്ക് അടിയന്തിര ശസ്ത്രക്രിയ നിശ്ചയിക്കുകയും പരിശോധനകൾ നടത്തുകയും ചെയ്തു. ജില്ല മാറി വന്ന ആളായതിനാൽ കോവിഡ് പരിശോധനയും കൂടെ നടത്തുകയായിരുന്നു. റിസൾട്ട് വന്നപ്പോൾ കോവിഡ് പോസിറ്റീവ്. ഇദ്ദേഹത്തിന് കോവിഡ് രോഗലക്ഷണങ്ങൾ ഒന്നും തന്നെ ഉണ്ടായിരുന്നില്ല. രോഗം പിടിപെട്ടത് എവിടെനിന്നെന്നും വ്യക്തമല്ല. രോഗലക്ഷണമോ സമ്പർക്കമോ ഇല്ലാതെ രോഗം റിപ്പോർട്ട് ചെയ്യുന്നത് ആരോഗ്യപ്രവർത്തകരിൽ ആശങ്ക സൃഷ്ടിച്ചിരിക്കുകയാണ് .