സിംഗപ്പൂർ : സിംഗപ്പൂരിൽ ആദ്യമായി സൂം ആപ്പ് വഴി വധശിക്ഷ വിധിച്ച് സുപ്രീംകോടതി. 2011 ൽ മയക്കുമരുന്ന് കേസിൽ അറസ്റ്റിലായ മലേഷ്യൻ പൗരൻ പുനിതൻ ഗണേശനെ (37) യാണ് സിംഗപ്പൂർ കോടതി സൂം ആപ്പ് വഴി വധശിക്ഷക്ക് വിധിച്ചത്. കൊറോണ വ്യാപനം മൂലം രാജ്യത്ത് ലോക് ഡൗൺ പ്രഖ്യാപിച്ചതുമുതൽ കോടതി നടപടികളെല്ലാം വീഡിയോ കോൺഫറൻസ് വഴിയാണ് നടത്തുന്നത്. ലോക്ഡൗൺ ആയതിനാൽ അനിവാര്യമായ കേസുകൾ മാത്രമാണ് കോടതി കേൾക്കുന്നത്. വിധിക്കെതിരെ അപ്പീൽ പോകുമെന്ന് ഗണേശന്റെ അഭിഭാഷകൻ പറഞ്ഞു. നേരത്തെ നൈജീരിയയിലും സൂം ആപ്പ് വഴി കോടതി വധശിക്ഷ വിധിച്ചിരുന്നു. സൂം ആപ്പ് പോലുള്ള വീഡിയോ അപ്ലിക്കേഷൻ വഴി വധശിക്ഷ വിധിക്കുന്നതിനെതിരെ മനുഷ്യാവകാശ പ്രവർത്തകർ രംഗത്ത് വന്നിട്ടുണ്ട്.