മലപ്പുറം: സ്വർണക്കടത്തിന് കോവിഡ് വ്യാപനവും ലോക് ഡൗണുമൊന്നും പ്രശ്നമല്ലെന്ന് തെളിയിക്കുകയാണ് സ്വർണക്കടത്ത് മാഫിയ. തരം കിട്ടിയാൽ എപ്പോൾ വേണമെങ്കിലും സ്വർണക്കടത്ത് നടത്താനുള്ള തയാറെടുപ്പുകളുമായി എപ്പോഴും ജാഗ്രതയിലാണെന്നു തെളിയിക്കുകയാണ് സ്വർണക്കടത്ത് സംഘം. ഇതിന്റെ തെളിവാണ് കഴിഞ്ഞ ദിവസം ലോക്ഡൗൺ മൂലം ഗൾഫിൽ നിന്നെത്തിയവരെ നാട്ടിലെത്തിക്കുന്ന പ്രത്യേക വിമാനം വഴിയുള്ള സ്വർണക്കടത്ത്. കഴിഞ്ഞ ദിവസം ഒരു മണിക്ക് ജിദ്ദയിൽ നിന്ന് കോഴിക്കോട് വിമാനത്താവളത്തിലെത്തിയ യാത്രക്കാരിയിൽ നിന്ന് 7.65 ലക്ഷത്തിന്റെ സ്വർണമാണ് പിടികൂടിയത്. മലപ്പുറം സ്വദേശിയാണ് യാത്രക്കാരി. കേരളത്തിലെ വിമാനത്താവളങ്ങളിൽ വന്ദേ ഭാരത് രക്ഷാദൗത്യത്തിന്റെ ഭാഗമായി നാട്ടിലേക്ക് തിരിച്ചെത്തുന്നവരിൽ നിന്നും സ്വർണം പിടികൂടുന്നത് ആദ്യമായാണ്.