പാലക്കാട്: കോൺഗ്രസ്സ് നേതാക്കൾ പാസില്ലാതെ അതിർത്തികടത്താൻ ശ്രമിച്ച ഒരാൾക്ക് കോവിഡ് സ്ഥിരീകരിച്ച സാഹചര്യത്തിൽ ഇതിനു നേതൃത്വം നൽകിയ കോൺഗ്രസ്സ് എംഎൽഎമാർക്കെതിരെ പകർച്ചവ്യാധി പ്രതിരോധ നിയമപ്രകാരം കേസ്സെടുക്കണമെന്ന് സിപിഐ എം പാലക്കാട് ജില്ലാ സെക്രട്ടറി സി.കെ.രാജേന്ദ്രൻ ആവശ്യപ്പെട്ടു. കോൺഗ്രസ്സ് നേതാക്കൾ പാസില്ലാതെ അതിർത്തി കടത്താൻ ശ്രമിച്ചവരിൽ ഒരാൾക്കു രോഗം സ്ഥിരീകരിച്ച സാഹചര്യത്തിൽ ഈ നേതാക്കൾക്ക് ക്വാറന്റൈൻ നിർബന്ധമാക്കണം. സംസ്ഥാന സർക്കാരിന്റെ നല്ല പ്രവർത്തനങ്ങളെ നിഷ്പ്രഭമാക്കി ജനവികാരം ഇളക്കി വിട്ട് രാഷ്ട്രീയ മുതലെടുപ്പിന് ശ്രമിക്കുകയാണ് കോൺഗ്രസ്സ് നേതാക്കളെന്നും അദ്ദേഹം പറഞ്ഞു. അതിർത്തി കടന്നുവരുന്ന ഓരോരുത്തരെയും നിരീക്ഷിക്കാനും അവർക്ക് ചികിത്സ ഉറപ്പാക്കാനും വേണ്ടിയാണ് സംസ്ഥാന സർക്കാർ പാസ് ഏർപ്പെടുത്തിയത്. ഇതിനെയൊക്കെ അട്ടിമറിക്കുന്ന തരത്തിലാണ് കോൺഗ്രസ്സ് നേതാക്കൾ പെരുമാറിയതെന്നും സി.കെ.രാജേന്ദ്രൻ പറഞ്ഞു.