ചെന്നൈ : കോവിഡ് ചികിത്സക്കായി സ്വയം വികസിപ്പിച്ച മരുന്ന് കഴിച്ച ഔഷധ കമ്പനിയിലെ മാനേജർ മരിച്ചു. മരുന്ന് കമ്പനി ഉടമയായ രാജ് കുമാറും, അതെ കമ്പനിയിലെ പ്രൊഡക്ഷൻ മാനേജരും ഫാർമസിസ്റ്റുമായി ജോലി നോക്കുന്ന കെ. ശിവനേശനും ചേർന്ന് വികസിപ്പിച്ച മരുന്ന് ഇവർ സ്വന്തം ശരീരത്തിൽ തന്നെ പരീക്ഷിച്ചു നോക്കുകയായിരുന്നു. കോവിഡിനായുള്ള മരുന്ന് കഴിച്ച ഉടൻ തന്നെ ഇരുവരും തളർന്നു വീണു. ഉടൻ ആശുപത്രിയിൽ എത്തിച്ചെങ്കിലും ശിവനേശൻ മരിച്ചു. ഇദ്ദേഹം മരുന്ന് കൂടുതൽ കഴിച്ചതായും കമ്പനി ഉടമ രണ്ടു തുള്ളി മരുന്ന് മാത്രമാണ് കഴിച്ചതെന്നും പറയുന്നു. രാജ്‌കുമാറിന്റെ ആരോഗ്യ നിലയിൽ പുരോഗതിയുണ്ട്. സംഭവത്തിൽ പോലീസ് കേസെടുത്തു.