ന്യൂഡൽഹി :  ദുരിതമനുഭവിക്കുന്നവർക്ക് സഹായമെത്തിക്കാതെ ലോക്ഡൗൺ ഈ രീതിയിൽ തുടരാനാവില്ലെന്ന് രാഹുൽ ഗാന്ധി. അന്തർ സംസ്ഥാന തൊഴിലാളികൾക്ക് സഹായമെത്തിക്കണം. സാമ്പത്തിക പാക്കേജ് ഉടൻ പ്രഖ്യാപിക്കണമെന്നും ചെറുകിട വ്യവസായികൾക്ക് സഹായം നൽകാൻ കേന്ദ്ര സർക്കാർ തയാറാകണമെന്നും രാഹുൽ ഗാന്ധി പറഞ്ഞു. സൂം ആപ്പ്ളിക്കേഷൻ വഴി നടത്തിയ വാർത്താ സമ്മേളനത്തിലാണ് രാഹുൽ ഗാന്ധി ഈ ആവശ്യങ്ങൾ ഉന്നയിച്ചത്. ജനത്തിന് സഹായം എത്തിക്കാതെയുള്ള ലോക്ഡൗൺ ദുരന്തമാകും. എപ്പോഴാണ് സമ്പദ് വ്യവസ്ഥയിലെ നിയന്ത്രണങ്ങൾ പിൻവലിക്കുന്നത്, അതിനുള്ള മാന ദണ്ഡങ്ങൾ എന്താണെന്ന് അറിയണമെന്നും രാഹുൽ ഗാന്ധി പറഞ്ഞു.