കോഴിക്കോട്: മുഖ്യമന്ത്രിയുടെ ദുരിതാശ്വാസ നിധിയിലേക്ക് കോൺഗ്രസ് ഒരു പൈസ പോലും നൽകില്ലെന്ന് കെ മുരളീധരൻ. വാര്‍ത്താ സമ്മേളനത്തില്‍ മുഖ്യമന്ത്രി പറയുന്നത് ഭൂരിഭാഗവും കള്ളമാണെന്നും പിണറായി വിജയന്‍ ധിക്കാരിയായ മുഖ്യമന്ത്രിയാണെന്നും കെ. മുരളീധരന്‍ പറഞ്ഞു.

ഇനി ഒരു വര്‍ഷം കൂടി മാത്രമേ പിണറായിയെ സഹിക്കേണ്ടതുള്ളൂവെന്നും ഡിക്ഷ്ണറിയില്‍ ഇല്ലാത്ത വാക്കുകള്‍ വരെ മുഖ്യമന്ത്രി കസേരയില്‍ ഇരുന്ന് പിണറായി പറഞ്ഞെന്നും മുരളീധരന്‍ കുറ്റപ്പെടുത്തി. കുടിയേറ്റ തൊഴിലാളികളുടെ മടക്കത്തിനുള്ള തുക കോൺഗ്രസ് നൽകിയപ്പോൾ സംസ്ഥാനം അത് നിരസിച്ചിരുന്നു. ഇതിനുള്ള മറുപടിയാണ് മുരളീധരന്റെ പ്രതികരണം. 

ആലപ്പുഴ, എറണാകുളം, കണ്ണൂര്‍ ജില്ലകളിലെ കളക്ടര്‍മാരും തുക സ്വീകരിച്ചില്ലെന്നും എന്തുകൊണ്ടാണ് തുക വാങ്ങാത്തതെന്ന് മുഖ്യമന്ത്രി വിശദീകരിക്കണമെന്നും മുല്ലപ്പള്ളി രാമചന്ദ്രനും നേരത്തെ ആവശ്യപ്പെട്ടിരുന്നു. എന്നാൽ പ്രശ്‌നം കേന്ദ്ര സര്‍ക്കാറുമായി ബന്ധപ്പെട്ടതാണെന്നും സംസ്ഥാന സര്‍ക്കാര്‍ അതില്‍ ഇടപെടില്ലെന്ന് മുഖ്യമന്ത്രിയും വ്യക്തമാക്കിയിരുന്നു.