തിരുവനന്തപുരം: മാറ്റിവച്ച എസ്.എസ്.എൽ.സി, പ്ലസ് വണ്‍, പ്ലസ് ടു പരീക്ഷകള്‍ മെയ് 20 മുതല്‍ നടത്താന്‍ ആലോചന. തുടര്‍ച്ചയായ ദിവസങ്ങളില്‍ പരീക്ഷ പൂര്‍ത്തിയാക്കുന്ന കാര്യമാണ് പരിഗണനയിൽ. കഴിഞ്ഞ പരീക്ഷകളുടെ മൂല്യനിര്‍ണയം മേയ് 11 മുതല്‍ തുടങ്ങാനും നീക്കമുണ്ട്. ഇന്ന് ചേരുന്ന മന്ത്രിസഭാ യോഗത്തില്‍ ഇക്കാര്യത്തില്‍ അന്തിമ തീരുമാനമുണ്ടാകും. 

എസ്.എസ്.എൽ.സി ക്ക് 3 പരീക്ഷയും പ്ലസ് ടുവിന് 4 പരീക്ഷയുമാണ് ബാക്കിയുള്ളത്. പ്ലസ് വണ്‍ പരീക്ഷയും മൂല്യനിര്‍ണയവും പിന്നീട് നടത്താമെന്ന് നേരത്തെ അഭിപ്രായം ഉയര്‍ന്നിരുന്നു. എന്നാല്‍ ആ തീരുമാനം മാറ്റി. എസ്.എസ്.എൽ.സി പരീക്ഷയ്ക്ക് 20 പേരും ഹയര്‍ സെക്കന്‍ഡറി പരീക്ഷയ്ക്ക് 30 പേരുമായിരുന്നു നേരത്തെ ഒരു പരീക്ഷാഹാളില്‍. 

സാമൂഹിക അകലം പാലിക്കാന്‍ പരീക്ഷ നടത്തിപ്പിനായി കൂടുതല്‍ ക്ലാസ് മുറികള്‍ ഒരുക്കും. മൂല്യനിര്‍ണയത്തിന് കൂടുതല്‍ അധ്യാപകരെയും അവര്‍ക്ക് അധിക സമയം ഡ്യൂട്ടിയുമാണ് പരിഗണനയില്‍. രാജ്യ വ്യാപക ലോക്ക്ഡൗണ്‍ മെയ് 17 ഓടെ അവസാനിക്കുമെന്നാണ് വിലയിരുത്തൽ.