തിരുവനന്തപുരം: നെടുമങ്ങാടിൽ ലോക്ക് ഡൗൺ ലംഘനം നടത്തിയതിന് ആറ്റിങ്ങൽ എം.പി അടൂർ പ്രകാശിനെതിരെ കേസെടുത്തു. നിർദ്ദേശം ലംഘിച്ച് ഭക്ഷ്യ കിറ്റ് വിതരണം ചെയ്തതിനാണ് കേസ്. സ്ഥലത്ത് ഇരുന്നൂറോളം പേർ ഉണ്ടായിരുന്നതായി പോലീസ് പറഞ്ഞു. അഞ്ച് പേരിൽ കൂടുതൽ പേർ കൂട്ടം കൂടരുതെന്നാണ് നിർദ്ദേശിച്ചിട്ടുള്ളത്. ഈ നിർദ്ദേശമാണ് ലംഘിച്ചത്. 

നെടുമങ്ങാട് കോടതിക്ക് മുമ്പിൽ ഇന്ന് രാവിലെയാണ് ലോയേഴ്സ് കോണ്‍ഗ്രസ് ഭക്ഷ്യകിറ്റ് വിതരണം സംഘടിപ്പിച്ചത്. അടൂര്‍ പ്രകാശ് എം.പി ഉത്‌ഘാടനം ചെയ്ത പരിപാടിയില്‍ സംഘാടകരെ കൂടാതെ എണ്‍പതിലേറെപ്പേര്‍ പങ്കെടുത്തു. സാമൂഹിക അകലമോ സുരക്ഷാനടപടികളോ പാലിച്ചില്ലെന്ന് ആരോപിച്ചാണ് എം.പിയ്ക്കും കണ്ടാലറിയാവുന്ന പത്തിലേറെപ്പേര്‍ക്കുമെതിരെ നെടുമങ്ങാട് പൊലീസ് കേസെടുത്തിരിക്കുന്നത്. 

അതേസമയം താൻ ലോക്ക് ഡൗൺ ചട്ടങ്ങൾ ലംഘിച്ചിട്ടില്ലെന്നും കേസ് രാഷ്ട്രീയ പ്രേരിതമാണെന്നും അടൂർ പ്രകാശ് എം.പി പ്രതികരിച്ചു.