കൊല്ലം: കൊല്ലത്ത് ഇന്നലെ ആറു പേർക്ക് കൂടി കൊവിഡ് സ്ഥിരീകരിച്ചതോടെ ജില്ലയിൽ ആകെയുള്ള രോഗികളുടെ എണ്ണം പതിനഞ്ചായി. കൂടുതൽ പേർക്കും സമ്പർക്കം വഴിയാണ് രോഗം സ്ഥിരീകരിച്ചതെന്നതിനാൽ ആശങ്കയിലാണ് ജില്ല. സമൂഹ വ്യാപന സാധ്യത കണക്കിലെടുത്തത് ഏറ്റവും കൂടുതൽ രോഗികളുള്ള ചാത്തന്നൂരിൽ നിരോധനാജ്ഞ പ്രഖ്യാപിച്ചിരിക്കുകയാണ്. 

ചാത്തന്നൂരിലെ ആശാ വർക്കാർക്കാണ് ആദ്യം റാൻഡം പരിശോധനയിലൂടെ രോഗം സ്ഥിരീകരിക്കുന്നത്. ഇവരുമായി സമ്പര്‍ക്കത്തില്‍ ഏര്‍പ്പെട്ട മറ്റൊരു ആശാ പ്രവര്‍ത്തക, ജൂനിയര്‍ പബ്ലിക് ഹെല്‍ത്ത് നഴ്‌സ്, ഗ്രേഡ് ടു അറ്റന്‍ഡര്‍, രാഷ്ട്രീയ പ്രവര്‍ത്തകന്‍ എന്നിവര്‍ക്കും രോഗം സ്ഥിരീകരിച്ചിട്ടുണ്ട്. ആശാ പ്രവര്‍ത്തകയ്ക്ക് വൈറസ് ബാധിച്ചത് എവിടെ നിന്നാണെന്നത് സംബന്ധിച്ച് ഇനിയും വ്യക്തത വന്നിട്ടില്ല. 

ജില്ലയിലെ കുളത്തൂപ്പുഴ, തെന്മല, ആര്യങ്കാവ്, തൃക്കാവില്‍വട്ടം, കരുനാഗപ്പള്ളി എന്നിവിടങ്ങളിലും നിലവിൽ നിരോധനാജ്ഞ പ്രഖ്യാപിച്ചിട്ടുണ്ട്.