തിരുവനന്തപുരം: സംസ്ഥാനത്ത് ഇന്ന് 10 പേർക്ക് കൂടി കൊവിഡ് സ്ഥിരീകരിച്ചു. 10 പേരുടെ ഫലം ഇന്ന് നെഗറ്റീവ് ആയിട്ടുണ്ട്. കൊല്ലം, തിരുവനന്തപുരം, കാസർഗോഡ് എന്നീ ജില്ലകളിലാണ് ഇന്ന് കൊവിഡ് സ്ഥിരീകരിച്ചത്.  

ആറു പേർ കൊല്ലത്തും തിരുവനന്തപുരം, കാസർഗോഡ് എന്നിവിടങ്ങളിൽ നിന്നും രണ്ട് പേർക്ക് വീതവുമാണ് ഇന്ന് രോഗം സ്ഥിരീകരിച്ചത്. കൊല്ലത്ത് അഞ്ച് പേർക്ക് സമ്പർക്കം വഴിയാണ് രോഗം സ്ഥിരീകരിച്ചത്. ഒരാൾ ആന്ധ്രാ സ്വദേശിയാണ്. 

തിരുവനന്തപുരത്ത് രോഗം സ്ഥിരീകരിച്ചവർ തമിഴ്‌നാട്ടിൽ നിന്നും വന്നവരാണ്. കാസർഗോഡിൽ സമ്പർക്കം വഴിയാണ് രോഗം സ്ഥിരീകരിച്ചത്. കണ്ണൂർ, കോഴിക്കോട്, കാസർഗോഡ് എന്നീ ജില്ലകളിൽ മൂന്ന് പേരുടെ വീതം ഫലങ്ങളാണ് ഇന്ന് നെഗറ്റീവ് ആയത്. മറ്റൊരാൾ പത്തനംതിട്ട ജില്ലയിലുള്ളയാളാണ്. 

495 പേർക്ക് ഇതുവരെ സംസ്ഥാനത്ത് കൊവിഡ് സ്ഥിരീകരിച്ചു. നിലവിൽ ആകെ ചികിത്സയിൽ കഴിയുന്നവർ 123 പേരാണ്. ഇന്ന് 84 പേരെയാണ് ആശുപത്രിയിൽ പ്രവേശിപ്പിച്ചത്. 20,673 പേർ നിലവിൽ നിരീക്ഷണത്തിൽ കഴിയുന്നുണ്ട്. 20,172 പേർ വീടുകളിൽ നിരീക്ഷണത്തിലാണ്. 51 പേർ ആശുപത്രികളിലും നിരീക്ഷണത്തിൽ കഴിഞ്ഞ് വരുന്നു.