തിരുവനന്തപുരം: സംസ്ഥാനത്ത് നാളെ മുതൽ പുറത്തിറങ്ങുന്നവർക്ക് മാസ്കുകൾ നിർബന്ധമാക്കി. പൊതു സ്ഥലത്ത് മാസ്ക് ധരിക്കാതെ ഇറങ്ങുന്നവര്‍ക്കെതിരെ നിയമ നടപടി സ്വീകരിക്കുമെന്ന് സംസ്ഥാന പൊലീസ് മേധാവി ലോക്നാഥ് ബെഹ്റ വ്യക്തമാക്കി.
ഇതിന് വേണ്ടി ഇന്ന് മുതല്‍ വ്യാപക പ്രചാരണം ആരംഭിക്കും. നവമാധ്യമങ്ങള്‍ വഴിയാണ് പ്രചാരണം. മാസ്ക് ധരിക്കാത്തവര്‍ക്കെതിരെ ദുരന്തനിവാരണ നിയമപ്രകാരം പിഴ ചുമത്തുന്നത് പരിഗണിക്കുമെന്നും ഇത് സംബന്ധിച്ച ഉത്തരവ് ഇന്നിറങ്ങുമെന്നും ഡി.ജി.പി മാധ്യമങ്ങളെ അറിയിച്ചു. 

അതേസമയം വയനാട് ജില്ലയിൽ ഇന്ന് മുതൽ മാസ്കുകൾ കർശനമാക്കിയിട്ടുണ്ട്. മുഖാവരണം ധരിക്കാത്തവരിൽ നിന്ന് 1,000 രൂപ പിഴ ഈടാക്കുമെന്നും ജില്ലാ ഭരണകൂടം അറിയിച്ചു.