ഇടുക്കി: ഇടുക്കിയിൽ മൂന്ന് പേർക്ക് കൂടി കൊവിഡ് സ്ഥിരീകരിച്ചു. ഇന്നലെ രാത്രിയോടെയാണ് ഇവർക്ക് രോഗം സ്ഥിരീകരിക്കുന്നത് മൂവരെയും ആശുപത്രിയിലേക്ക് മാറ്റിയിട്ടുണ്ട്. ഇടുക്കി ജില്ലാ കളക്ടർ എച്ച് ദിനേശനാണ് ഇത് സംബന്ധിച്ച വിവരം പുറത്ത് വിട്ടത്. ജില്ലയിലേക്ക് അതിർത്തി വഴിയും ഊടുവഴികൾ വഴിയും വരുന്നവരെ കണ്ടെത്തി ക്വാറന്റൈലാക്കുന്നതുമായി ബന്ധപ്പെട്ട നിർദ്ദേശങ്ങൾക്ക് കളക്ടർ ഉത്തരവിട്ടു. 

രോഗം സ്ഥിരീകരിച്ച മൂന്ന് പേരും തൊടുപുഴ സ്വദേശികളാണ്. അതിൽ ഒരു ആരോഗ്യ പ്രവർത്തകയും മറ്റൊരാള്‍ പ്രാദേശിക പൊതുപ്രവര്‍ത്തകനും മറ്റൊരാള്‍ മരിയാപുരം സ്വദേശിയുമാണ്. റാപ്പിഡ് പരിശോധനയിലൂടെയാണ് ഇവർക്ക് രോഗം സ്ഥിരീകരിച്ചത്. ഇവർ ഇന്നലെ വരെ നിരവധി പേരുമായി സമ്പർക്കത്തിലേർപ്പെട്ടിട്ടുണ്ടെന്നാണ് വിവരം. അതിനാൽ കൂടുതൽ പേരെ നിരീക്ഷണത്തിൽ വെക്കേണ്ട സാഹചര്യമാണുള്ളത്. 

കഴിഞ്ഞ ദിവസങ്ങളിൽ വരെ ഇടുക്കി ഗ്രീൻസോണിൽ ഉൾപ്പെട്ട മേഖലയായിരുന്നു. ഇടുക്കിയും കോട്ടയവും വളരെ പെട്ടെന്നാണ് ഗ്രീൻസോണിൽ നിന്ന് റെഡ് ‌സോണിലേക്കെത്തിയത്.