കൊച്ചി: 50,000 കോടി രൂപയുടെ പ്രത്യേക പദ്ധതിയുമായി ആർ.ബി.ഐ. മ്യൂച്വൽ ഫണ്ടുകൾക്ക് പണ ലഭ്യത ഉറപ്പാക്കുന്നതിനുള്ള പദ്ധതിയാണ് ആർ.ബി.ഐ പ്രഖ്യാപിച്ചിരിക്കുന്നത്. രാജ്യത്തെ മ്യൂച്വൽ ഫണ്ടുകളുടെ പ്രവർത്തനത്തിന് പണ ലഭ്യത ഉറപ്പാക്കുന്നതാണ് നടപടി. 

പ്രഖ്യാപനം ഉണ്ടായി തൊട്ടുപിന്നാലെ ഓഹരി വിപണി കുതിച്ചുയർന്നു. സെൻസെക്സ് 750 പോയിൻറുകളോളം ആണ് ഉയർന്നത്. ഇന്നു മുതൽ മെയ് 11 വരെയാണ് പണം ലഭിയ്ക്കുക. വിപണിയിലെ അവസ്ഥയ്ക്കനുസൃതമായി സമയപരിധിയിലും പ്രഖ്യാപിച്ചിരിയ്ക്കുന്ന തുകയിലും ആർബിഐ മാറ്റം വരുത്തിയേക്കും.

പദ്ധതി പ്രകാരം ആർബിഐ ബാങ്കുകൾക്ക് കുറഞ്ഞ നിരക്കിൽ പണം ലഭ്യമാക്കുകയും ബാങ്കുകൾക്ക് മ്യൂച്വൽ ഫണ്ട് പദ്ധതികൾക്ക് പണലഭ്യത ഉറപ്പാക്കാൻ കഴിയുകയും ചെയ്യും. കടപ്പത്രങ്ങൾ, കോർപ്പറേറ്റ് ബോണ്ടുകൾ, കൊമോഴ്സ്യൽ പേപ്പറുകൾ എന്നിവ നൽകി മ്യൂച്വൽ ഫണ്ട് സ്ഥാപനങ്ങൾക്ക് ബാങ്കിൽ നിന്ന് വായ്പ എടുക്കുകയുമാവാം.