Sunday 16-Aug-2026
പ്രവാസികളുടെ മടക്കം: എയര്പോര്ട്ടുകളിൽ പരിശോധനക്ക് വിപുലമായ സജ്ജീകരണം
2020-04-27 By Admin
തിരുവനന്തപുരം: തിരിച്ചെത്തുന്ന പ്രവാസികൾക്കായി സംസ്ഥാനത്തെ നാല് എയര്പോര്ട്ടുകളിലും പരിശോധനയ്ക്ക് വിപുലമായ സജ്ജീകരണം ഒരുക്കുമെന്ന് മുഖ്യമന്ത്രി പിണറായി വിജയൻ. വിമാനത്താവളത്തിലെ പരിശോധനയില് രോഗലക്ഷണമൊന്നുമില്ലെങ്കില് 14 ദിവസം വീടുകളില് നിരീക്ഷണത്തില് കഴിയണം. വീടുകളില് അതിനുള്ള സൗകര്യമില്ലെങ്കില് സര്ക്കാര് നേരിട്ട് ഒരുക്കുന്ന നിരീക്ഷണ കേന്ദ്രത്തിലേക്ക് മാറണം.
സ്വന്തം വാഹനം വരികയാണെങ്കില് ഡ്രൈവര് മാത്രമേ പാടുള്ളൂ. വീട്ടിലേക്ക് പോകുന്ന പ്രവാസി നേരെ വീട്ടിലേക്കായിരിക്കണം പോകേണ്ടത്. ബന്ധുക്കള്, സുഹൃത്തുക്കള് എന്നിവരെ സന്ദര്ശിക്കരുത്. രോഗലക്ഷണത്തോടെ നിരീക്ഷണ കേന്ദ്രത്തിലേക്ക് പോകേണ്ടി വരുന്നവരെ കൂടുതല് പരിശോധനക്ക് വിധേയമാക്കും. അത്തരക്കാരെ കൊവിഡ് ആശുപത്രിയില് പ്രവേശിപ്പിക്കും. അവരുടെ ലഗേജ് ബന്ധപ്പെട്ട സെന്ററുകളില് ഭദ്രമായി സൂക്ഷിക്കും.
പ്രവാസികളെ കൊണ്ടു വരുമ്പോൾ ലേബര് ക്യാമ്പില് ജോലിയും വരുമാനവുമില്ലാതെ കഴിയുന്ന സാധാരണ തൊഴിലാളികള്, വിസിറ്റിംഗ് വിസ കാലാവധി കഴിഞ്ഞവര്, പ്രായമായവര്, ഗര്ഭിണികള്, കുട്ടികള്, മറ്റു രോഗമുള്ളവര്, വിസ കാലാവധി പൂര്ത്തിയാക്കപ്പെട്ടവര്, കോഴ്സ് പൂര്ത്തിയാക്കി സ്റ്റുഡന്റ് വിസയില് കഴിയുന്ന വിദ്യാര്ത്ഥികള്, ജയില് മോചിതരായവര് എന്നിവര്ക്ക് മുന്ഗണന നല്കേണ്ടതുണ്ട്. എന്നാല് ഇക്കാര്യത്തില് കേന്ദ്രസര്ക്കാര് തീരുമാനം നിർണായകമാണെന്നും മുഖ്യമന്ത്രി പറഞ്ഞു.