തിരുവനന്തപുരം: കോർപ്പറേഷൻ പരിധി മുഴുവൻ ഹോട്സ്‌പോട്ടാക്കിയ നടപടി സർക്കാർ പിൻവലിച്ചു. തിരുവനന്തപുരം കോർപ്പറേഷനിലെ കളിപ്പാംകുളം, അമ്പലത്തറ വാർഡുകളും വർക്കല മുനിസിപ്പാലിറ്റിയും മാത്രമാകും ഇനി ഹോട്സ്പോട്ട്. ഇത് സംബന്ധിച്ച് ഉത്തരവായി. 

ഇനി മുതൽ ഈ രണ്ട് വാർഡുകളും വർക്കല മുൻസിപ്പാലിറ്റിയും ഒഴികെയുള്ള പ്രദേശങ്ങൾ ഓറഞ്ച് കാറ്റഗറിയിൽ ആയിരിക്കും. ഓറഞ്ച് കാറ്റഗറിയിൽ ഉൾപ്പെട്ടിട്ടുള്ള പ്രദേശങ്ങൾ പിൻതുടരേണ്ട നിബന്ധനകൾ ഹോട്ട് സ്പോട്ടുകൾ ഒഴികെയുള്ള സ്ഥലങ്ങളിൽ പ്രാബല്യത്തിലുണ്ടായിരിക്കുമെന്ന് ജില്ലാ കളക്ടർ അറിയിച്ചു. 

ആർക്കെങ്കിലും രോഗബാധ സ്ഥിരീകരിക്കുകയോ രോഗവ്യാപന സാധ്യത കണക്കിലെടുക്കുകയോ ചെയ്താൽ ജില്ലാ ഭരണകൂടത്തിന് പ്രാദേശികമായി നിയന്ത്രണം ഏർപ്പെടുത്താമെന്നും കളക്ടർ പറഞ്ഞു. നിലവിൽ ജില്ലയിൽ ചികിത്സയിൽ കഴിയുന്നത്‌ ഒരാൾ മാത്രമാണ്.