കൊച്ചി: പ്രവാസികളെ നാട്ടിലെത്തിക്കുന്നതുമായി ബന്ധപ്പെട്ട് ഇടക്കാല ഉത്തരവ് പുറപ്പെടുവിക്കുക എന്നത് നിലവിലെ സാഹചര്യമനുസരിച്ച് പ്രായോഗികമല്ലെന്ന് ഹൈക്കോടതി. പ്രവാസികളെ തിരിച്ചെത്തിക്കുന്നതിനായി കേന്ദ്രവും കേരളവും എന്ത് നടപടികൾ സ്വീകരിച്ചു എന്നത് സംബന്ധിച്ച വിവരം അറിയിക്കണമെന്നും ഹൈക്കോടതി നിർദ്ദേശിച്ചു. 

ഭീതിയൊഴിഞ്ഞ സാഹചര്യമല്ലാത്തതിനാൽ പ്രവാസികളെ കൊണ്ട് വരുന്നതിന് പ്രായോഗികമായ ബുദ്ധിമുട്ടുകൾ ഉണ്ടെന്നും കോടതി വ്യക്തമാക്കി. പ്രവാസികളുടെ കാര്യത്തില്‍ സഹതാപമുണ്ടെന്നും സാഹചര്യം മോശമായതിനാൽ കേന്ദ്രത്തിന്റെ തീരുമാനത്തോട് യോജിക്കാനേ കഴിയുള്ളൂവെന്നും കോടതി അറിയിച്ചു. 

ഗർഭിണികളായ നഴ്‌സുമാർ പലയിടത്തായും കുടുങ്ങിക്കിടക്കുന്ന കാര്യം കോടതിയെ അറിയിച്ചിരുന്നു. ഇക്കാര്യത്തില്‍ എന്ത് നടപടികളാണ് സ്വീകരിച്ചിരിക്കുന്നതെന്ന് കേന്ദ്രസര്‍ക്കാര്‍ അറിയിക്കണമെന്നും മേയ് അഞ്ചിന് ഹർജി വീണ്ടും പരിഗണിക്കുമ്പോൾ വ്യക്തമായ മറുപടി നൽകണമെന്നും കോടതി നിർദ്ദേശിച്ചു.