ഇന്ത്യയിൽ കൊവിഡ് മരണസംഖ്യ ഉയരുന്നു. രാജ്യത്ത് കൊവിഡ് ബാധിച്ച് മരിച്ചവരുടെ എണ്ണം 199 ആയി. 24 മണിക്കൂറിനിടെ 30 മരണങ്ങളാണ് റിപ്പോർട്ട് ചെയ്തത്. ഇതുവരെ രാജ്യത്ത് 6412 പേർക്കാണ് രോഗം സ്ഥിരീകരിച്ചത്. 

ഇതിൽ ഏറ്റവും കൂടുതൽ പേർ മരണപ്പെട്ടത് മഹാരാഷ്ട്രയിലാണ്. കഴിഞ്ഞ ദിവസം മാത്രം ഇവിടെ 25 പേരാണ് മരിച്ചത്. ഇതോടെ മഹാരാഷ്ട്രയിൽ ആകെ മരണപ്പെട്ടത് 97 പേരാണ്. 1346 പേരാണ് സംസ്ഥാനത്തെ ആകെ രോഗബാധിതർ. ഇന്ന് രണ്ട് മലയാളി നഴ്‌സുമാർക്ക് കൂടി ഇവിടെ കൊവിഡ് സ്ഥിരീകരിച്ചു. ഇതോടെ കൊവിഡ് സ്ഥിരീകരിച്ച മലയാളി നഴ്‌സുമാരുടെ എണ്ണം 57 ആയി. 

അസമിലും ആദ്യത്തെ കൊവിഡ് മരണം സ്ഥിരീകരിച്ചു. വടക്ക്-കിഴക്കൻ സംസ്ഥാനങ്ങളിൽ റിപ്പോർട്ട് ചെയ്യുന്ന ആദ്യത്തെ മരണമാണിത്. നിസാമുദീൻ സമ്മേളനത്തിൽ പങ്കെടുത്ത അറുപത്തിയഞ്ചുകാരനാണ് മരണപ്പെട്ടത്. 

അതേസമയം ഗുജറാത്തിൽ 17 ഉം മധ്യപ്രദേശിൽ 16 ഉം മരണങ്ങളാണ് റിപ്പോർട്ട് ചെയ്തത്. ഡൽഹിയിലും രോഗികളുടെ എണ്ണം കൂടുകയാണ്. ആകെ 720 കൊവിഡ് പോസിറ്റീവ് കേസുകളാണ് ഇവിടെ റിപ്പോർട്ട് ചെയ്തിരിക്കുന്നത്. ഇവിടെ ആകെ 12 പേർ മരിച്ചു. രാജ്യത്ത് ആകെ 504 പേർക്കാണ് രോഗം പൂർണ്ണമായും ഭേദമായത്.