പാലക്കാട്: കൊറോണ വൈറസിന്റെ പശ്ചാത്തലത്തിൽ കേരളത്തിൽ നിന്നുള്ള വാഹനങ്ങൾ അതിർത്തി കടത്തി വിടില്ലെന്ന് തമിഴ്നാട്. കൃത്യമായ പരിശോധനക്ക് ശേഷം ആളുകളെ തമിഴ്‌നാട്ടിലെ വാഹനങ്ങളിൽ യാത്ര തുടരാൻ സൗകര്യമൊരുക്കും. ഇന്ന് വൈകുന്നേരത്തോടെ നിയന്ത്രണം ശക്തമാക്കാൻ കളക്ടർമാർക്ക് നിർദ്ദേശം നൽകിയിട്ടുണ്ട്. 

കൊല്ലം അതിര്‍ത്തിക്കപ്പുറത്തെ പുളിയറ ചെക്പോസ്റ്റിൽ നിരവധി വാഹനങ്ങൾ തടഞ്ഞു. എന്നാൽ പരിശോധനക്ക് ശേഷം യാത്ര തുടരാൻ അനുവദിക്കുമെന്ന് ആരോഗ്യ വകുപ്പ് സെക്രട്ടറി അറിയിച്ചു. വാളയാർ ചെക് പോസ്റ്റ് വഴിയുള്ള വാഹനങ്ങൾക്കും നിയന്ത്രണമുണ്ട്. 

മിക്ക കേരള രജിസ്‌ട്രേഷൻ വാഹനങ്ങളും തിരിച്ചയക്കുന്നുണ്ട്. ആശുപത്രി കേസുകളും അടിയന്തര ആവശ്യങ്ങൾക്കായി പോകുന്നവരേയും മാത്രമാണ് ഇത് വഴി കടത്തി വിടുന്നത്. തമിഴ്‌നാട്ടിലേക്ക് പോകണമെന്ന് നിർബന്ധമുള്ളവരെ  തമിഴ്നാട് സർക്കാർ ഏർപ്പെടുത്തിയ വാഹങ്ങളിലാണ് തമിഴ്‌നാട്ടിലേക്ക് പോകാൻ സൗകര്യമൊരുക്കുക. 

അതേസമയം വൈറസ് വ്യാപനത്തോടെ തമിഴ്‌നാട്ടിലെ പ്രധാന ആരാധനാലയങ്ങളും ചന്തകളും ആളുകൾ കൂടുന്നിടങ്ങളെല്ലാം തന്നെ അടച്ച് പൂട്ടാൻ സർക്കാർ ഉത്തരവിറക്കി. തമിഴ്ന്നടിൽ ഇതുവരെ മൂന്ന് പേർക്കാണ് രോഗം സ്ഥിരീകരിച്ചിട്ടുള്ളത്. ഇതിന് പിന്നാലെയാണ് കർശന നിയന്ത്രണങ്ങൾ ഏർപ്പെടുത്തിയിരിക്കുന്നത്.

Content in Short : Covid 19 -Vehicles from kerala blocked at Tamil Nadu border