പൗരത്വ ഭേദഗതി നിയമത്തിന്റെ പശ്ചാത്തലത്തിൽ പൗരത്വമില്ലാതെ പുറത്താകുന്നവർക്ക് രാജ്യത്തിൽ തടങ്കൽ കേന്ദ്രങ്ങളൊരുക്കുന്നില്ലെന്നും ദേശീയ പൗരത്വ രജിസ്റ്ററിയുമായി ബന്ധപ്പെട്ട് ഒരു ചർച്ചയും നടന്നിട്ടില്ലെന്നുമുള്ള പ്രധാനമന്ത്രിയുടെ പ്രസ്താവനക്ക് മറുപടിയുമായി രംഗത്ത് വന്നിരിക്കുകയാണ് രാഹുൽഗാന്ധി. പ്രധാനമന്ത്രി പറയുന്നത് പച്ചക്കള്ളമാണെന്നാണ് രാഹുലിന്റെ ആരോപണം.

ആർ.എസ്.എസിന്റെ പ്രധാനമന്ത്രി ഭാരത മാതാവിനോട് കള്ളം പറയുന്നു എന്ന് തന്റെ ട്വിറ്റർ അക്കൗണ്ടിലൂടെയാണ് രാഹുൽ ആരോപണമുന്നയിച്ചത്. 'നുണ നുണ നുണ' എന്ന ഹാഷ്‌ടാഗോടെ അസമിൽ പണി തീർന്ന് വരുന്ന തടങ്കൽ കേന്ദ്രത്തിന്റെ ബിബിസി റിപ്പോർട്ടോടു കൂടിയ വീഡിയോയാണ് രാഹുൽ പങ്കുവച്ചത്.