പാരീസ്​: ഫ്രാൻസ്​ കോവിഡ്​ അഞ്ചാം തരംഗത്തിന്‍റെ ആരംഭത്തിലാണെന്ന്​ ആരോഗ്യമന്ത്രി ഒലിവർ ​വെറൻ. ടി.എഫ്​ 1 ചാനലിന്​ നൽകിയ അഭിമുഖത്തിലാണ്​ പ്രതികരണം. അയൽരാജ്യങ്ങ​ളെ പോലെ തന്നെ ഫ്രാൻസും കോവിഡ്​ അഞ്ചാം തരംഗത്തിന്‍റെ ആരംഭത്തിലാണെന്ന്​ അദ്ദേഹം പറഞ്ഞു. കോവിഡിൽ നിന്ന്​ ലോകരാജ്യങ്ങൾ കരകയറുന്നുവെന്ന വാർത്തകൾക്കിടെയാണ്​ ആശങ്കപ്പെടുത്തുന്ന പ്രഖ്യാപനവുമായി ഫ്രഞ്ച്​ മന്ത്രി തന്നെ രംഗത്തെത്തിയിരിക്കുന്നത്​. കഴിഞ്ഞ ദിവസം ഫ്രാൻസിൽ 11,883 പേർക്കാണ്​ കോവിഡ്​ സ്ഥിരീകരിച്ചത്​. തുടർച്ചയായ രണ്ടാമത്തെ ദിവസമാണ്​ പ്രതിദിന കോവിഡ്​ രോഗികളുടെ എണ്ണം 10,000 കടക്കുന്നത്​. കോവിഡ്​ രോഗികളുടെ എണ്ണം ഉയരുന്നതിനിടെ പുതിയ ചില നിയന്ത്രണങ്ങൾ ഫ്രഞ്ച്​ പ്രസിഡന്‍റ്​ ഇമാനുവൽ മാക്രോൺ രാജ്യത്ത്​ പ്രഖ്യാപിക്കുകയും ചെയ്​തിട്ടുണ്ട്​.